تلك الفتاة السودانية الأصيلة التي تعتز بسودانيتها في دولة الإمارات العربية المتحدة وهي
مديرة الثقافة في أبو ظبي
الأستاذة الإعلامية والروائية نعمات حمود
رحمها الله
تعرفت عليها حينما شارك شقيقي الأصغر الشاعر عبد المحمود ود الخاوية في الملتقي الشعري الشعبي في الإمارات وبعد رحيله (رحمهما الله) فقد كَتَبَتْ عن الخاوية وحضرت من الإمارات لتأبينه الأول في مركز شباب أمدرمان فقد كانت جاذبةً لكل الأنظار بحضورها
متأنقةً
متألقة
وبكلماتها التي أوفت الخاوية حقه
نعمات إلتقيتها بعد ذلك 2020 مشاركاً في نفس المهرجان ممثلاً للسودان في الشارقة فقد كانت هي روح ذلك المهرجان ونجمته المتلألأة وببسمتها التي لا تفارقها
هذه الفتاة قد كانت نعمةً من الله (نعمات)
طيبةٌ
رضيةٌ
في غاااااااية البساطة
تحمل السودان في قلبها
من أول يوم في هذا المهرجان تكون في معيتنا من الصباح وحتي الليل وبعد ذلك تظل تتفقد الوفد حتي أواخر الليل
هي فقد السودان والإمارات
وفقد للثقافة في البلدين
جاءني خبر وفاتها وكان كالصاعقة من الشارقة
بعد أن انتهت مشاركتي في المهرجان كَتَبْتُ لها قصيدةً وأرسلتها لها وكانت في غااااية السعادة بها وشكرتني لكأنما أهديتها كل هذا الكون لأن قلبها كبير ونفسها رضية
اللهم ارحمها واغفر لها واجعلها من أصحاب اليمين يا رب العالمين
وإليكم هذه القصيدة
نعمة ربنا السواها في نعمات
تقابلك باسمة بدل الهم مكسبك نعمات
كم في القاسية راضية وقاضية لمهمات
وفي السمحات هي ماضية وخاتية من زمات
متابعة معانا مما بدينا لامن جينا
كل شيتن موفر ليها ما اترجينا
وقفت فينا تحلف زي تقول حجينا
تهتم تتصل حت صمتها يناجينا
لقياها وحديثة الحالي برضو بسطنا
ما أحلاها لما تكون هي قاعدة وسطنا
ما بتخرب تصوط هي العدلت رصتنا
كانت جد حديثنا وشعرنا وحصتنا
زولة ودودة نعمات شفتي كيف يا الخنسا
تتذكر صحابة وحاشا تب ما بتنسي
مي زي ناس فلان بدو العلاقات كنسة
نعمات نعمة سيرتة خاتية من الدنسة
حَلَف ما اتزمّرت في يوم ولا بتتضايق
مع كل الوفود بالمرحمة بتتلايق
ثقافتة عالية للتوب مالية ما بتتعايق
شكلها كل يوم بِحَلَي وكمان يتزايق
صبورة وصامتة ما بِتريد يلعلع صوتة
ماسكة على العهود والسمحة ما بتصوتة
قعدنا معاها شفنا عرفنا كيفن فوتة
فايتة رجال وراكزة حلفت مي مكفتوتة
من شفناها اول يوم بشوشة وباسمة
ساعة الجد بتقلب تبقى جادة وحاسمة
تجيك بسراع تجر للفرحة شايلة وراسمة
سمحة خلقة ساك يا الشيخ تمش متقاسمة
قايمة وقاعدة هايمة وصاعدة بالسودان
بتعمل باجتهاد شان رفعة السودان
لابسة التوب مهيرة العزت السودان
بتكرم كل زول كان ترضى للسودان
حديثة دوام بتسمع منو للسودان
تفكر في البكون لي رفعة السودان
قدر ما تشوفة بتجيب سيرة السودان
بعد الله ورسوله التالت السودان
عندها كلمة في بلد الخليج في الشارقة
بالسودان بتدخل وبالمكارم مارقة
لي علم البلد بحليفة تب مي حارقة
رافعة إسِمنا فيه وَسِمْنا عسلة وشارقة
علاقتة واسعة توصل كل حتة تزورة
وان نزرت عهد بتوفي وكتي نزورة
تعاين للبلد والله مي معزورة
شدرة عزنا فروعة بتمد لي جذورة
لازم تكرمة ولو راضي أو مرغوم
عشان روحة الرضية دربها مو ملغوم
ما بنقدر نوفي وليها عظمة نقوم
وشكرن من هنا ولما القيامة تقوم
بسأل ربي نقدر لي جميلة نردو
يا سابل الستر بنيانة تب ما تهدو
باب الرحمة بالخير والكرم ما تسدو
يا رب ليها انظر وليها كرمك مدو
شاحد الله الكريم النعمة فيك تنكب
تكون مقبولة وين ما تمشي عز تنحب
يا رافع السما ومجري البحار يا رب
تعلى مقامة فوق في الدنيا ما تنسب
أنعم يا كريم نعمات تعمم خيرة
بالستر الخفي وبالنور تَحَسِّن سيرة
بي يد قدرتك أديها تكرم غيرة
يا ربي الحفظ ما تلقى عايق يضيرة
قدر ما نذكرك لله بِنَدَعَّالك
يكرمك انتي بي خيرو الكتير يرعالك
الدايراهو كلو يجيك براو يسعالك
على المابيك تكون فوق راسو قوة نعالك
تقبلها الله
وبعد أن كتبت هذه القصيدة وأرسلتها لها كان ما كان
فكتبت هذه الدعوات بعد الوفاة
وقلت
يا رب العباد نعمات بنشهد ليها
إنها طيبة حتي الصافية بتجليها
في اعلي الجنان يا ربنا تعليها
بالخير والسمح بالمرحمة تسليها
اللهم آمين
محي الدين نديم الليل
1/9/2022
أمرحي الشيخ الطيب
