حوار _ محمد جمال قندول
هلّ علينا رمضان والبلاد تشهد تطوراتٍ في مختلف المناحي لتطبيع عودة الحياة. الشهرُ الكريم يختلف هذه المرة عن العامين السابقين، إذ عاد عددٌ كبيرٌ من المواطنين للبلاد، فيما استقبلت الخرطوم مُحيا هذه الأيام المباركة وكأنّها عروس بعد أن استعادت رونقها وتفاصيل حياتها الدافئة والوارفة والزاهية.
ولأنّ رمضان له مذاقٌ خاص في السودان وأكثر خصوصية في عاصمة الصمود الخرطوم هذا العام، فقد خصصت «الكرامة» مساحةً للحوار مع رموز تنفيذية، وسياسية، وإعلامية، وفنية، ورياضية، واجتماعية من داخل البلاد، لتطوف معهم على أجواء رمضان في السودان.
وضيف مساحتنا لهذا اليوم هو الممثل الكوميدي عبد الله عبد السلام فضيل، فإلى مضابط إفاداته:
رمضان في السودان؟
إحساس تاني، حاجة ما في أي دولة، لو مشيت أي حتة وصمت ما حتلقى طعم الصيام الهنا.
أول حاجة تبدأ من العلاقات الاجتماعية، ونوع الأكل البيقدم، والعصاير، يعني “التبلدي والحلو المر” إتربينا عليها ومرتبطة وجدانيًا بينا، عشان كدا رمضان السودان ما بشبه أي مكان.
صايم وين الآن؟
في الخرطوم، ولي 11 شهر ، وهسي مستقر فيها قاعد في أمدرمان.
إحساس رمضان في العاصمة؟
يا سلام ياخ زي الرجوع للجذور الواحد حس بأنه دا أفضل رمضان الواحد يصومو، رجعنا للناس الزمان والبرش مع إنه البرش اتغير لكن الناس معظمها ما اتغيروا.
رمضان 2023؟
كان ماشي كويس لحدت ما رمضان انتهى أنا كنت صايم كنا بنطلع بتذكر برة وأنا طلعت بعد الحرب في عيد الضحية.
صف لنا إحساس العاصمة مع مؤشّرات تزايد العائدين؟
ناس أم درمان رجعوا بكل حاجاتم، ناس الخرطوم لسه ما رجعوا، يعني أنا بمشي الديم ووين وين لسه الحياة ما جات، لكن بالمجمل الإعمار الحصل في 8 لـ6 شهور في الخدمات دا إعجاز ونحن بنقول للناس أرجعوا أي شوية عايزة صبر وتحمل لكن الناس لازم ترجع.
ماذا قدمت في رمضان الحالي فنياً؟
قدمت حاجة اسمها “كبسولات” حاجة صغيرة يعني بسبب ضيق ذات اليد، يعني إنتاج مما في معاي أخونا أحمد سالم، وعلي الزين، وإبراهيم سالم، والمصور هيثم الزومة، والمصور صديق، والإضاءة فاولينو، واتعاونا كلنا عملنا الورشة دي وطلعنا الشغل دا 90 في المية كبسولات توعوية عن رمضان والنسيج الاجتماعي في قناة الدراما السودانية، وفي ظهور ثاني على قناة السمراء أخونا عليوة عامل أفلام قصيرة مشينا ليه في نهر النيل قدمنا معاهم زي 14 فيلم قصير على قناة السمراء على اليوتيوب.
ما تعليقك على منتوج الدراما السودانية في رمضان؟
ما بكضب عليك ما شفت حاجة حتى شغلي ما شفتو لأني في رمضان بكون في عزلة من البيت للجامع والأسرة وقراءة القرآن. لكن من خلال الفيس شايف في كم مسلسل أُنتج والتحية لكل من أنتج مسلسل في هذه الظروف والتحية لكل مبدعي البلاد الذين ينحتون في الصخر ورحم الله موتانا وموتى المسلمين والتحايا للقوات المسلحة المرابطين في الثغور.
طقوس تحبها في الشهر الكريم؟
الجبنة البعد الفطور ونحن بنفطر في الضرا برة بعد نصلي الواحد بياخد ليه قعدة كدا ويجيبو ليه الجبنة بالبخور والفشار يعني طقس زي دا لو تدفع تريليون ما بتخليه.
عنوان مثير او غامض
